A ranar Asabar din da ta gabata ne ‘yan sanda a jihar Anambra suka cafke wani da ake zargi, Nnamdi Chude, da laifin yin rubutu a shafinsa na Twitter kan gwamnan jihar Anambra, Farfesa Chukwuma Soludo.
Chude, wani mai tsananin goyon bayan jam’iyyar Labour ne ya wallafa a shafinsa na Twitter a ranar Asabar, inda ya yi zargin cewa jam’iyyar Soludo, jam’iyyar All Progressives Grand Alliance, APGA, na da hannu a magudin zaben ‘yan majalisar wakilai.
Ya dage cewa Soludo ne ya taimaka wajen yin magudin, kuma wasu ‘yan daba sun kwashe akwatunan zabe. Ya bayyana irin wannan mataki a matsayin mayar da Anambra zuwa zamanin tsohon gwamna, Dr Chinwoke Mbadinuju.
Daga baya jami’an ‘yan sanda sun kama Chude a Onitsha inda suka koma Awka babban birnin jihar.
A halin da ake ciki kuma, wani sako da Sakataren Yada Labarai na Gwamnan Jihar Anambra, Mista Christian Aburime ya aike da shi ya ce an garzaya da wanda ake zargin zuwa Abuja ranar Lahadi, kuma Gwamnan ba shi da hannu a kama shi, ballantana ya san laifinsa.
Aburime ya ce: “Kwamishanan ‘yan sandan jihar Anambra ya tabbatar wa Gwamnan Jihar Anambra Farfesa Chukwuma Charles Soludo, CFR cewa, an kama wani Mista Nnamdi Chude a jiya (18/03/23) a Anambra ta hanyar aikata laifuka ta Intanet. Sashen Interpol kuma aka kai shi Abuja yau (19/03/23).
“Gwamnatin jihar Anambra ba ta da wani bayani game da wani takamaiman zarge-zarge ko kuma dalilin kama shi.”
Daga sakamakon da hukumar zabe mai zaman kanta ta kasa INEC ta sanar, jam’iyyar APGA ta gwamna Soludo ta lashe mafi yawan kujerun ‘yan majalisar dokokin jihar, sai kuma jam’iyyar Labour.