Paul Okoye, wanda aka fi sani da Rudeboy na rusasshiyar kungiyar mawakan Psquare, ya yi kira ga rundunar ‘yan sandan Najeriya kan matakin da ta dauka kan barazanar da shugaban kwamitin kula da wuraren shakatawa na jihar Legas, Musiliu Akinsanya, wanda aka fi sani da MC Oluomo ya yi.
Oluomo, a cikin wani faifan bidiyo da ya fito, ya yi barazana ga ‘yan kabilar Igbo mazauna jihar Legas da ko wannensu ku fito ku kada kuri’a ga jam’iyyar All Progressives Congress, APC, a zaben gwamna da ke gudana ko a ci gaba da zama a gida.
Da yake mayar da martani kan barazanar, kakakin rundunar, Adejobi Olumuyiwa, ya ce barazanar da MC Oluomo ke yi wa ‘yan kabilar Igbo da ke yawo a shafukan sada zumunta, wasa ne kawai.
A cewar jami’in hulda da jama’a na rundunar, babu wanda ke da hurumin hana mutanen Legas kada kuri’unsu ga dan takarar da suke so.
Sai dai Rudeboy wanda ya fusata da martanin da ‘yan sandan suka mayar, ya yi amfani da shafinsa na Twitter inda ya caccaki ‘yan sandan yana mai cewa hukumar tsaro ce babbar matsala a kasar.
Ya rubuta cewa, “Har sai mun gane babbar matsalarmu a Najeriya ita ce jami’an tsaro…wani yana yi wa wasu kabilu barazana a Legas, sai ‘yan sanda suka fito suna cewa wasa kawai yake yi.
“Yanzu ku kalli abin da ke faruwa a Legas a yau!! Oga Police da gaske yake yi? Mutane marasa kunya”.